Sri Chinnamasta Kavacham – శ్రీ ఛిన్నమస్తా కవచం
దేవ్యువాచ |
కథితాశ్ఛిన్నమస్తాయా యా యా విద్యాః సుగోపితాః |
త్వయా నాథేన జీవేశ శ్రుతాశ్చాధిగతా మయా || 1 ||
ఇదానీం శ్రోతుమిచ్ఛామి కవచం పూర్వసూచితమ్ |
త్రైలోక్యవిజయం నామ కృపయా కథ్యతాం ప్రభో || 2 ||
భైరవ ఉవాచ |
శృణు వక్ష్యామి దేవేశి సర్వదేవనమస్కృతే |
త్రైలోక్యవిజయం నామ కవచం సర్వమోహనమ్ || 3 ||
సర్వవిద్యామయం సాక్షాత్సురాత్సురజయప్రదమ్ |
ధారణాత్పఠనాదీశస్త్రైలోక్యవిజయీ విభుః || 4 ||
బ్రహ్మా నారాయణో రుద్రో ధారణాత్పఠనాద్యతః |
కర్తా పాతా చ సంహర్తా భువనానాం సురేశ్వరి || 5 ||
న దేయం పరశిష్యేభ్యోఽభక్తేభ్యోఽపి విశేషతః |
దేయం శిష్యాయ భక్తాయ ప్రాణేభ్యోఽప్యధికాయ చ || 6 ||
దేవ్యాశ్చ చ్ఛిన్నమస్తాయాః కవచస్య చ భైరవః |
ఋషిస్తు స్యాద్విరాట్ ఛందో దేవతా చ్ఛిన్నమస్తకా || 7 ||
త్రైలోక్యవిజయే ముక్తౌ వినియోగః ప్రకీర్తితః |
హుంకారో మే శిరః పాతు ఛిన్నమస్తా బలప్రదా || 8 ||
హ్రాం హ్రూం ఐం త్ర్యక్షరీ పాతు భాలం వక్త్రం దిగంబరా |
శ్రీం హ్రీం హ్రూం ఐం దృశౌ పాతు ముండం కర్త్రిధరాపి సా || 9 ||
సా విద్యా ప్రణవాద్యంతా శ్రుతియుగ్మం సదాఽవతు |
వజ్రవైరోచనీయే హుం ఫట్ స్వాహా చ ధ్రువాదికా || 10 ||
ఘ్రాణం పాతు చ్ఛిన్నమస్తా ముండకర్త్రివిధారిణీ |
శ్రీమాయాకూర్చవాగ్బీజైర్వజ్రవైరోచనీయ హూమ్ || 11 ||
హూం ఫట్ స్వాహా మహావిద్యా షోడశీ బ్రహ్మరూపిణీ |
స్వపార్శ్వే వర్ణినీ చాసృగ్ధారాం పాయయతీ ముదా || 12 ||
వదనం సర్వదా పాతు చ్ఛిన్నమస్తా స్వశక్తికా |
ముండకర్త్రిధరా రక్తా సాధకాభీష్టదాయినీ || 13 ||
వర్ణినీ డాకినీయుక్తా సాపి మామభితోఽవతు |
రామాద్యా పాతు జిహ్వాం చ లజ్జాద్యా పాతు కంఠకమ్ || 14 ||
కూర్చాద్యా హృదయం పాతు వాగాద్యా స్తనయుగ్మకమ్ |
రమయా పుటితా విద్యా పార్శ్వౌ పాతు సురేశ్వరీ || 15 ||
మాయయా పుటితా పాతు నాభిదేశే దిగంబరా |
కూర్చేణ పుటితా దేవీ పృష్ఠదేశే సదాఽవతు || 16 ||
వాగ్బీజపుటితా చైషా మధ్యం పాతు సశక్తికా |
ఈశ్వరీ కూర్చవాగ్బీజైర్వజ్రవైరోచనీయ హూమ్ || 17 ||
హూం ఫట్ స్వాహా మహావిద్యా కోటిసూర్యసమప్రభా |
ఛిన్నమస్తా సదా పాయాదూరుయుగ్మం సశక్తికా || 18 ||
హ్రీం హ్రూం వర్ణినీ జానుం శ్రీం హ్రీం చ డాకినీ పదమ్ |
సర్వవిద్యాస్థితా నిత్యా సర్వాంగం మే సదాఽవతు || 19 ||
ప్రాచ్యాం పాయాదేకలింగా యోగినీ పావకేఽవతు |
డాకినీ దక్షిణే పాతు శ్రీమహాభైరవీ చ మామ్ || 20 ||
నైరృత్యాం సతతం పాతు భైరవీ పశ్చిమేఽవతు |
ఇంద్రాక్షీ పాతు వాయవ్యేఽసితాంగీ పాతు చోత్తరే || 21 ||
సంహారిణీ సదా పాతు శివకోణే సకర్త్రికా |
ఇత్యష్టశక్తయః పాంతు దిగ్విదిక్షు సకర్త్రికాః || 22 ||
క్రీం క్రీం క్రీం పాతు సా పూర్వం హ్రీం హ్రీం మాం పాతు పావకే |
హ్రూం హ్రూం మాం దక్షిణే పాతు దక్షిణే కాలికావతు || 23 ||
క్రీం క్రీం క్రీం చైవ నైరృత్యాం హ్రీం హ్రీం చ పశ్చిమేఽవతు |
హూం హూం పాతు మరుత్కోణే స్వాహా పాతు సదోత్తరే || 24 ||
మహాకాలీ ఖడ్గహస్తా రక్షఃకోణే సదావతు |
తారో మాయా వధూః కూర్చం ఫట్ కారోఽయం మహామనుః || 25 ||
ఖడ్గకర్త్రిధరా తారా చోర్ధ్వదేశం సదాఽవతు |
హ్రీం స్త్రీం హూం ఫట్ చ పాతాలే మాం పాతు చైకజటా సతీ |
తారా తు సహితా ఖేఽవ్యాన్మహానీలసరస్వతీ || 26 ||
ఇతి తే కథితం దేవ్యాః కవచం మంత్రవిగ్రహమ్ |
యద్ధృత్వా పఠనాద్భీమః క్రోధాఖ్యో భైరవః స్మృతః || 27 ||
సురాసుర మునీంద్రాణాం కర్తా హర్తా భవేత్స్వయమ్ |
యస్యాజ్ఞయా మధుమతీ యాతి సా సాధకాలయమ్ || 28 ||
భూతిన్యాద్యాశ్చ డాకిన్యో యక్షిణ్యాద్యాశ్చ ఖేచరాః |
ఆజ్ఞాం గృహ్ణంతి తాస్తస్య కవచస్య ప్రసాదతః || 29 ||
ఏతదేవ పరం బ్రహ్మ కవచం మన్ముఖోదితమ్ |
దేవీమభ్యర్చ గంధాద్యైర్మూలే నైవ పఠేత్సకృత్ || 30 ||
సంవత్సరకృతాయాస్తు పూజాయాః ఫలమాప్నుయాత్ |
భూర్జే విలిఖితం చైతద్గుటికాం కాంచనస్థితామ్ || 31 ||
ధారయేద్దక్షిణే బాహౌ కంఠే వా యది వాన్యతః |
సర్వైశ్వర్యయుతో భూత్వా త్రైలోక్యం వశమానయేత్ || 32 ||
తస్య గేహే వసేల్లక్ష్మీర్వాణీ చ వదనాంబుజే |
బ్రహ్మాస్త్రాదీని శస్త్రాణి తద్గాత్రే యాంతి సౌమ్యతామ్ || 33 ||
ఇదం కవచమజ్ఞాత్వా యో భజేచ్ఛిన్నమస్తకామ్ |
సోఽపి శస్త్రప్రహారేణ మృత్యుమాప్నోతి సత్వరమ్ || 34 ||
ఇతి శ్రీభైరవతంత్రే భైరవభైరవీసంవాదే త్రైలోక్యవిజయం నామ ఛిన్నమస్తాకవచం సంపూర్ణమ్ |
